ہم پہ ساقی کی عنایت سے جلے جاتے ہیں (غزل) - شکیبؔ احمد

To read in English (Roman) and Hindi (Devanagari), click here.

ہم پہ ساقی کی عنایت سے جلے جاتے ہیں

یہ جو اَب تک کفِ افسوس ملے جاتے ہیں

یاد آ جاتی ہیں بے ساختہ باتیں ان کی

بے سبب ہونٹ تبسم میں ڈھلے جاتے ہیں

وقتِ رخصت کی پس و پیش انہیں کیا معلوم

دل رکا جاتا ہے جانے سے ولے جاتے ہیں

رفتہ رفتہ دمِ آخیر بھی آ پہنچے گا

رات دن وصل کے وعدوں پہ ٹلے جاتے ہیں

جائیے کچھ نہیں کہتے، جو ہوا ہے سو ہوا

سارے الزام مقدر کے گلے جاتے ہیں

ضبطِ گریہ میں شکیبؔ آپ نے پایا ہے کمال

ان کی گلیوں سے بھی چپ چاپ چلے جاتے ہیں

شکیبـؔ احمد

(اپریل ۲۰۲۰)

الفاظ و معانی

کفِ افسوس ملنا : افسوس کرتے ہوئے ہتھیلیوں کو ملنا |  hand wrung in distress

عنایت : کرم، نوازنا | blessings

تبسم : مسکراہٹ | smile

پس و پیش : آگے پیچھے ہونا، جھجک، ہچکچاہٹ | hesitation, indecision

ولے : لیکن, yet, however

ضبطِ گریہ : رونے پر قابو پانا، آنسو نہ نکلنے دینا | holding back tears