اپنا من دکھیارا کیسا، اپنا حال تو ایسا ہے (غزل) - شکیبؔ احمد

 

اپنا من دکھیارا کیسا، اپنا حال تو ایسا ہے

ہردے میں اک جوت جلی ہے جس نے تن من پھونکا ہے

پریم نگر میں اک دن میں آ نکلا تھا بھولا بھٹکا

خود کو بھول چکا ہوں تب سے جگ بھی سارا بھولا ہے

کتنی کٹھن ہے پریم پریکشا، پریم ہوا تو کس سے ہوا

اپنے آپ کو سب سے چھپا کے جس نے چین کو لوٹا ہے

اس سنسار میں سب ہے تمہارا لیکن پریت کے ٹاپو پر

تم کے وِیوگ میں جو دکھ بھوگے اس کا مزا تو میرا ہے

صوفی ملا سنت پجاری ورد وظیفے سب کچھ ہیچ

پریتم کے جلوے کے آگے یارو سب کچھ پھیکا ہے۱

میں بھی مالا پھیر رہا تھا اس اک نام کی برسوں سے

اشکوں کی مالا پہ جپا تب نام وہ دل میں اترا ہے

من تو بہت ہے نعت لکھوں گا پیار سے اس کو گاؤں گا

لیکن تم نے مجھ کمبخت کو اس قابل کب سمجھا ہے۲

پوچھ رہا ہوں بستی بستی آنکھوں میں امید لیے

ایک شکیب احمد ہوتا تھا تم نے اس کو دیکھا ہے

(یکے از نگارشاتِ حرمین، 2020)

^۱ حرمِ مکی میں

^۲ روضۂ اقدسﷺ کے سامنے

الفاظ و معانی

ہِردے: دل، قلب | heart

پریم پریکشا: محبت کا امتحان | test of love

سنسار: دنیا، عالم | world

پریت: محبت، پیار| love

ٹاپو: جزیرہ | island

ویوگ: جدائی، فراق، ہجر| separation from beloved

دکھ بھوگنا: غم کاٹنا، تکلیف اٹھانا | to labor, to suffer

پریتم: محبوب | beloved